nigah-e-avvalin ki dilistani yaad aati hai
kisi na-mehrban ki mehrbani yaad aati hai
qarib-e-shaḳh-e-gul hoti hai jab dastan-sara bulbul
hamen bhi bhuli-bisri ik kahani yaad aati hai
dil-e-nashadman ko aur bhi nashad karne ko
dil-e-nashadman ki shadmani yaad aati hai
javani aur bu-e-gul men ya rab kya ta.alluq tha
ki bu-e-gul se piiri men javani yaad aati hai
ghazal ab ḳhatm ho jaati hai apni panch sheron par
javani aur tabi.at ki ravani yaad aati hai
Leave a Reply