Farhat Qadri
kabhi salib ki surat kabhi hilali tha
miri nigah men ik paikar-e-ḳhayali tha
hamari aap ki shayad koi misal nahin
jo mar gaya hai vahi aadmi misali tha
ka.i patang ki surat ḳhala men Duub gaya
vo jitna tez tha itna hi la-ubali tha
uḌa aur uḌ ke fazaon men ho gaya tahlil
badan ke bojh se us ka vajud ḳhali tha
vo toḌ leta tha patte hava ki shaḳhon se
kamal us ka haqiqat men be-kamali tha
bana hua tha jo shahr-e-vafa ka shahzada
vo main nahin tha mira zauq-e-ḳhush-jamali tha
main chhupta phirta tha shahron men kohsaron men
vo ek shaḳhs magar har jagah savali tha
paḌa tha raah men jo sang-e-mil se aage
vo apne vaqt ka ‘farhat’ nahin ghazali tha
Leave a Reply