zamana guzra hai lahron se jang karte hue
kabhi to paar lagun Dubte ubharte hue
baḌe hi shauq se ik ashiyan banaya tha
main kaise dekhun use TuTte bikharte hue
kabhi to zehn ke parde pe naqsh ubhrega
ye sochta huun tasavvur men rang bharte hue
har ik maqam pe tufan ne daboch liya
jahan jahan bhi chhupa andhiyon se Darte hue
vo buund buund qayamat vo nuur nuur badan
kisi ne dekha hi kab hai use sanvarte hue
vo meri zaat se ab bad-guman nahin shayad
tabhi to dekh nahin sakta mujh ko marte hue
Leave a Reply