dil kis se laga.un kahin dilbar nahin milta
kya zulm sahun koi sitamgar nahin milta
ḳhat le ke gaya jo vo kabutar nahin milta
kya zikr kabutar ka hai ik par nahin milta
zulfon ki tarah umr basar ho ga.i apni
ham ḳhana-ba-doshon ko kahin ghar nahin milta
kya ḳhaak mudava karen shorida-sari ka
sar phoḌne ko DhunDhen to patthar nahin milta
gunjalak nahin miTti jo tabi.at men paḌi hai
dil tujh se kisi taur se dilbar nahin milta
kya kijiye tarif bina gosh ki us ke
aveze ko jis kaan ke gauhar nahin milta
gum jab se hua huun main tiri rah-e-talab men
jab DhunDhta huun aap ko akasr nahin milta
kuchh talib-e-zar but hi nahin ghaur se dekho
haq yuun hai ki allah bhi be-zar nahin milta
surat nahin milti tiri surat se kisi ki
gahne se kisi ke tira zevar nahin milta
ara.ishen mauquf huiin kis liye ai jaan
gauhar nahin milta hai ki zar-gar nahin milta
abru ki mohabbat men kise ziist hai manzur
mar ja.un gala kaaT ke ḳhanjar nahin milta
rindan-e-mai-asham nahin jaam ke paband
ham ok se piite hain jo saghar nahin milta
vahshat men nikal ja.un main sarhad se zamin ki
is gumbad-e-gardan ka vale dar nahin milta
o barq-e-tajalli tire kushte ki lahad par
kya lauh bane tuur ka patthar nahin milta
hazir huun mujhe basta-e-fitrak-e-faras kar
gar said koi tark-e-sitamgar nahin milta
ashiq se na khinch aap ko ai badshah-e-husn
darvesh se kya jhuk ke tavangar nahin milta
jo zaḳhm ko siine ke siye Tanke jigar ko
aisa koi ustad rafugar nahin milta
ai ‘rind’ labalab ho jo irfan ki mai se
saghar vo ba-juz saqi-e-kausar nahin milta
Leave a Reply