har ek janib hai raqs karti ajiib si chup
ye dil ke angan men nauha likhti ajiib si chup
rah-e-vafa men jahan pe bhaTka tha ik musafir
vahin kahin pe hai haath malti ajiib si chup
hai kuchh sadaon ka pichha karti miri sama.at
aur ik ḳhamoshi se mujh ko takti ajiib si chup
vo meri palkon ke saa.e saa.e vafa ki belen
aur un se ḳhvabon ke phuul chunti ajiib si chup
ufuq pe yadon ke zard anchal men lipTa suraj
aur us pe shamon ke saath Dhalti ajiib si chup
vo pichhle mausam ka haath thame hasin manzar
vo agle mausam men us se laḌti ajiib si chup
vo ḳhush-gumani ki konpalon par khili tamanna
aur us ke haq men dua.en karti ajiib si chup
vo sard raton men ansuon ke charagh raushan
aur un charaghon ki lau men jalti ajiib si chup
vo ḳhvahishon ke badan se uThti sunahri ḳhushbu
vo dil ke mausam men chhup ke roti ajiib si chup
Leave a Reply