Dhup Saron Par Aur Daman Mein Saya Hai

dhuup saroñ par aur dāman meñ saayā hai

sun to sahī jo peḌoñ ne farmāyā hai

kaise kah duuñ biich apne dīvār hai jab

chhoḌne koī darvāze tak aayā hai

us se aage jāoge tab jāneñge

manzil tak to rāsta tum ko laayā hai

bādal ban kar chāhe kitnā ūñchā ho

paanī āḳhir miTTī kā sarmāyā hai

āḳhir ye nākām mohabbat kaam aa.ī

tujh ko kho kar maiñ ne ḳhud ko paayā hai

‘shāz’ mohabbat ko apnānā khel nahīñ

apne haath se apnā haath chhuḌāyā hai

Leave a Comment