dhuup saron par aur daman men saaya hai
sun to sahi jo peḌon ne farmaya hai
kaise kah duun biich apne divar hai jab
chhoḌne koi darvaze tak aaya hai
us se aage jaoge tab janenge
manzil tak to rasta tum ko laaya hai
badal ban kar chahe kitna uncha ho
paani aḳhir miTTi ka sarmaya hai
aḳhir ye nakam mohabbat kaam aa.i
tujh ko kho kar main ne ḳhud ko paaya hai
‘shaz’ mohabbat ko apnana khel nahin
apne haath se apna haath chhuḌaya hai
Leave a Reply