Zabanon Ka Bosa

zabanon ke ras men ye kaisi mahak hai

ye bosa ki jis se mohabbat ki sahba ki udti hai ḳhushbu

ye bad-mast ḳhushbu jo gahra ghunuda nasha la rahi hai

ye kaisa nasha hai

mere zehn ke reze reze men ek aankh si khul gai hai

tum apni zaban mere munh men rakhe jaise patal se meri jaan khinchte ho

ye bhiga hua garm o tarik bosa

amavas ki kaali barasti hui raat jaise umaDti chali aa rahi hai

kahin koi saaat azal se ramida

miri ruuh ke dasht men ud rahi thi

vo saaat qarin-tar chali aa rahi hai

mujhe aisa lagta hai

tarikiyon ke

larazte hue pul ko

main paar karti chali ja rahi huun

ye pul ḳhatm hone ko hai

aur ab

us ke aage

kahin raushni hai

deep kiss

Leave a Comment