tumhare naam tumhare nishan se be-sarokar
tumhari yaad ke mausam guzarte jaate hain
bas ek manzar-e-be-hijr-o-visal hai jis men
ham apne aap hi kuchh rang bharte jaate hain
na vo nashat-e-tasavvur ki lo tum aa hi gae
na zakhm-e-dil ki hai sozish koi jo sahni ho
na koi vaada-o-paiman ki shaam hai na sahar
na shauq ki hai koi dastan jo kahni ho
nahin jo mahmil-e-laila-e-arzu sar-e-rah
to ab faza men faza ke siva kuchh aur nahin
nahin jo mauj-e-saba men koi shamim-e-payam
to ab saba men saba ke siva kuchh aur nahin
utaar de jo kinare pe ham ko kashti-e-vahm
to gird-o-pesh ko girdab hi samajhte hain
tumhare rang mahakte hain khvab men jab bhi
to khvab men bhi unhen khvab hi samajhte hain
na koi zakhm na marham ki zindagi apni
guzar rahi hai har ehsas ko ganvane men
magar ye zakhm ye marham bhi kam nahin shayad
ki ham hain ek zamin par aur ik zamane men