Shahzad Ahmad
ḳhat men us ko kaise likkhen kya paana kya khona hai
duuri men to ho nahin sakta jo aapas men hona hai
niind ka panchhi aa pahuncha hai vahshi dil ki baat na sun
mil bhi ga.e to aḳhir thak kar gahri niind hi sona hai
vo aaya to saare mausam badle badle lagte hain
ya kanTon ki sej bichhi thi ya phulon ka bichhauna hai
abhi to ḳhushk bahut hai mausam barish ho to sochenge
ham ne apne armanon ko kis miTTi men bona hai
ham ko nasihat karne vaale ḳhud bhi yahi kuchh karte hain
tum kya qisse le baiThe ho ye umron ka rona hai
kanch ki guḌiyan taaq men kab tak aap saja.e rakkhenge
aaj nahin to kal TuTega jis ka naam khilauna hai
baḌe baḌe da.ave hain lekin chhoTe chhoTe qad ‘shahzad’
phankni hai kuchh ḳhaak un ko kuchh paani unhen bilona hai
Leave a Reply