kya ghazab hai ki mulaqat ka imkan bhi nahin
aur ab us ko bhulana koi asan bhi nahin
kise dekhun kise ankhon se laga.un ai dil
ru-e-taban bhi nahin zulf-e-pareshan bhi nahin
aur hain aaj Thikane tire divanon ke
koh-o-sahra bhi nahin dasht-o-bayaban bhi nahin
jaane kya baat hai sab ahl-e-junun hain ḳhamosh
aaj vo silsila-e-chak-e-gareban bhi nahin
gham-e-pinhan nazar aata hai mujhe dushman-e-jan
haa.e ye dard ki jis ka koi darman bhi nahin
kaun jaane mira anjam sahar tak kya ho
aaj koi dil-e-bimar ka pursan bhi nahin
haa.e ye ghar ki ab is men nahin basta koi
haif ye dil ki ab is men koi arman bhi nahin
uf ye tanha.i ye vahshat ye sukut-e-shab-e-tar
aur shabistan men koi sham-e-farozan bhi nahin
saath us gul ke gaya dil se gulistan ka ḳhayal
ab mujhe arzu-e-fasl-e-baharan bhi nahin
Leave a Reply