koi aaseb hai saaya hai ki jadugar hai
jaane kya baat hai har shaḳhs ke dil men Dar hai
ek hi rele men bah ja.egi ḳhasta buniyad
sail-e-be-mehr ke shanon pe hamara ghar hai
tere dil men bhi mohabbat ki hararat na rahi
mera sarmaya-e-ehsas bhi muTThi-bhar hai
saneha hai ki hamen luuTa gaya hai phir bhi
shahr luT jaane ka ilzam hamare sar hai
jism ujḌi hui basti ka khanDar lagta hai
ruuh viran jaziron ki tarah banjar hai
mujhe dhaḌka hai to bas TuuT ke gir jaane ka
soch ka koh-e-garan-bar mire sar par hai
jism andar se har ik lamha chaTaḳhta hai ‘niyaz’
yuun to qabron ki si ḳhamoshi mire bahar hai
Leave a Reply