ye zindagi safar hai Thahar hi na ja.iye
ye bhi ki be-ḳhayal guzar hi na ja.iye
sahra-e-haul-ḳhez men rahiye liye-diye
reg-e-ravan ke saath bikhar hi na ja.iye
jab Dubna hi tai hai ubharna muhal hai
daldal hai dil fareb utar hi na ja.iye
un raston men raat bhaTakti hai be-sabab
aisa bhi ḳhauf kya hai jo ghar hi na ja.iye
ab ke safar men hai ye naya zabta janab
jaana jidhar hai aap udhar hi na ja.iye
betab maut ki ye lalak zindagi bhi hai
yuun intizar-e-maut men mar hi na ja.iye
Leave a Reply