Ye Zindagi Safar Hai Thahar Hi Na Jaiye

ye zindagī safar hai Thahar hī na jā.iye

ye bhī ki be-ḳhayāl guzar hī na jā.iye

sahrā-e-haul-ḳhez meñ rahiye liye-diye

reg-e-ravāñ ke saath bikhar hī na jā.iye

jab Dūbnā hī tai hai ubharnā muhāl hai

daldal hai dil fareb utar hī na jā.iye

un rāstoñ meñ raat bhaTaktī hai be-sabab

aisā bhī ḳhauf kyā hai jo ghar hī na jā.iye

ab ke safar meñ hai ye nayā zābta janāb

jaanā jidhar hai aap udhar hī na jā.iye

betāb maut kī ye lalak zindagī bhī hai

yuuñ intizār-e-maut meñ mar hī na jā.iye

Leave a Comment