Har Ek Daricha Kiran Kiran Hai Jahan Se Guzre Jidhar Gae Hain

har ik daricha kiran kiran hai jahan se guzre jidhar gae hain

ham ik diya aarzu ka le kar ba-tarz-e-shams-o-qamar gae hain

jo meri palkon se tham na paae vo shabnamin mehrban ujale

tumhari ankhon men aa gae to tamam raste nikhar gae hain

vo duur kab tha harim-e-jan se ki lafz o maani ke naaz uthati

jo harf honton pe aa na paae vo ban ke khushbu bikhar gae hain

jo dard isa-nafas na hota to dil pe kya e’tibar aata

kuchh aur paiman kuchh aur paikan ki zakhm jitne the bhar gae hain

khazine jaan ke lutane vaale dilon men basne ki aas le kar

suna hai kuchh log aise guzre jo ghar se aae na ghar gae hain

jab ik nigah se kharash aai zamane bhar se gila hua hai

jo dil dukha hai to ranj saare na jaane kis kis ke sar gae hain

shikast-e-dil tak na baat pahunchi magar ‘ada’ kah sako to kahna

ki ab ke savan dhanak se anchal ke rang saare utar gae hain

Leave a Comment