Din Par Soch Sulagti Hai Ya Kabhi Raat Ke Bare Mein

din par soch sulagti hai ya kabhi raat ke baare men

koi baat nikal aati hai kaenat ke baare men

ek dusre se kab saare sayyare takrate hain

pur-ummid bahut huun aise hadsat ke baare men

kuchh sahta huun guzarte hue zamane ke lamhon ki saza

kuchh kahta huun na-mumkin se mumkinat ke baare men

sote jagte uthte baithte apne hi jhagde nahin kam

aur kai zaton ki uljhan ek zaat ke baare men

hairat ka ek apna husn bhi hai larza dene vaala

koi pareshani nahin us ke nabatat ke baare men

ghalat-salat sab ke apne apne andaze hain varna

kuchh bhi nahin kaha ja sakta kisi baat ke baare men

jab tak vo pahli tarjih rahega sab khairiyat hai

mausam ko hai tamam agahi phuul paat ke baare men

qatre ki pahchan hi dariya men gum ho jaana hai kabhi

kaisa josh-o-kharosh hai us ki mulaqat ke baare men

dil men koi chiiz chamakti bujhti rahti hai jo ‘zafar’

fikrmand bhi rahta huun main usi dhaat ke baare men

Leave a Comment