dar-o-divar pe hijrat ke nishan dekh aa.en
aao ham apne buzurgon ke makan dekh aa.en
aao bhigi hui ankhon se paḌhen nauha-e-dil
aao bikhre hue rishton ka ziyan dekh aa.en
TuuTa TuuTa hua dil le ke phiren galiyon men
kachchi miTTi ke khilaunon ki dukan dekh aa.en
raushni ke kahin asar to baaqi honge
aao pighli hui sham.on ka dhuan dekh aa.en
jin daraḳhton ke tale raqs-e-saba hota tha
sukhe patton ka barasna bhi vahan dekh aa.en
ab farishton ke siva koi na aata hoga
kaun deta hai ḳharabon men azaan dekh aa.en
muddaton ba.ad muhajir ki tarah aa.e hain
ruuTh jaa.e na khanDar aao miyan dekh aa.en
Leave a Reply