na sahi aish, guzara hi sahi
ya.ani gar tu nahin duniya hi sahi
chhoḌiye kuchh to mira bhi mujh men
ḳhuun ka aḳhiri qatra hi sahi
ghaur to kiije miri baton par
umr men aap se chhoTa hi sahi
ranj ham ne bhi juda paa.e hain
aap yakta hain to yakta hi sahi
main bura huun to huun ab kya kiije
koi achchha hai to achchha hi sahi
kis ko siine se laga.un tire ba.ad
jaate jaate koi dhoka hi sahi
kar kuchh aisa ki tujhe yaad rakhun
bhuul jaane ka taqaza hi sahi
tum pe kab rok thi chalte jaate
meri sochon pe to pahra hi sahi
vo kisi taur na hoga mera
chalo aisa hai to aisa hi sahi
surḳh karne lagi har shai ‘javvad’
yaad ka rang sunahra hi sahi
Leave a Reply