dekho firaq-e-yar men jaan kho raha hai vo
‘shahzad’ ko sambhalo bahut ro raha hai vo
aa.e na.e jo zaḳhm to ye ruuh ne kaha
kuchh der baiTh jaao abhi so raha hai vo
sahra ki ḳhaak haq men mire kah rahi hai ye
jo hona chahta tha vahi ho raha hai vo
pahle bhi ḳhali haath tha hai ab bhi ḳhali haath
aur kab se bar-e-sud-o-ziyan Dho raha hai vo
ai asman tu shukr ada us ka kijiyo
be-dil zamin ke siine men dil ho raha hai vo
dekho kahan kise mile ‘shahzad’ dahr men
ham ne suna hai ḳhud ko kahin kho raha hai vo
Leave a Reply