raha karte hain mai-khanon men ham pir-e-mughan ho kar
tabiat zinda-dil rakhti hai piiri men javan ho kar
chhupe the qabr men gardish-zada kya shadman ho kar
yahan bhi saath hai dauran-e-sarka asman ho kar
hua hai shohra daghon ka nisar-e-gul-rukhan ho kar
udi bu-e-vafa meri nasim-e-bostan ho kar
jhukegi rafta rafta shakh-e-nakhl-e-qad kaman ho kar
khinchega tuul furqat ka zah-e-tir-e-fughan ho kar
mushabah kar diya kyuun zoaf ne un ki nazakat se
mujhe khud apne uupar rashk aaya na-tavan ho kar
gai raunaq bhi chehre ki havas-o-aql jaate hain
uda sab rang-e-rukh vahshat men gard-e-karvan ho kar
zamin par sozish-e-gham se girega asman jal kar
sharar-e-dil chala sar halqa-e-daur-e-fughan ho kar
tasadduq un pe hota huun jo shoale dil se uthte hain
basar karta huun main parvana-e-sham-e-fughan ho kar
fana ho kar kahin mitti hai yarab shorish-e-vahshat
fughan karta huun main zanjir-e-bab-e-la-makan ho kar
khuda samjhe hamari ah-e-sozan se judai men
ki saari dil ki taqat ud gai munh se dhuan ho kar
dil-e-nalan ne ham-sayon ko bhi dushman kiya apna
raha karte hain ham battis danton men zaban ho kar
hamesha se ‘nazar’ ham mahv-e-yad-e-ru-e-raushan hain
chamak is dard ki rassi se ham dil men nur-e-jan ho kar
Leave a Reply