Ahmad Mushtaq
chand bhi nikla sitare bhi barabar nikle
mujh se achchhe to shab-e-gham ke muqaddar nikle
shaam hote hi barasne lage kaale badal
subh-dam log darichon men khule sar nikle
kal hi jin ko tiri palkon pe kahin dekha tha
raat usi tarah ke taare miri chhat par nikle
dhuup savan ki bahut tez hai dil dubta hai
us se kah do ki abhi ghar se na bahar nikle
pyaar ki shakh to jaldi hi samar le aai
dard ke phuul badi der men ja kar nikle
dil-e-hangama-talab ye bhi khabar hai tujh ko
muddaten ho gaiin ik shakhs ko bahar nikle
Leave a Reply