rasm-e-duniya ko nibhate ja.iye
gham ko siine se lagate ja.iye
bazla-sanji se na baaz aa.e agar
ham na lauTenge bulate ja.iye
hukm-e-nau ik aur jaari ho gaya
choT kha kar muskurate ja.iye
ḳhaak nazron men hamari jhonkiye
ḳhaak men ham ko milate ja.iye
aa.ina ho kar rahungi aap ka
meri nazron men samate ja.iye
zulmat-e-shab ko saja kar taaq par
ik diya ḳhud bhi jalate ja.iye
hai uThane ki sakat jo aap men
tohmat-e-duniya uThate ja.iye
ratjage ‘raziya’ se ab hain multamis
yaad ko apni sulate ja.iye
Leave a Reply