rah-e-junun men chala yuun main umr-bhar tanha
ki jaise koi bagula kare safar tanha
udasi ruuh se guzri hai is tarah jaise
ujaaḌ dasht men patjhaḌ ki dopahar tanha
bhaTak rahi hai ḳhalaon men yuun nazar jaise
ho raat men kisi gumrah ka guzar tanha
guzar ga.e jaras-e-gul ke qafile kab ke
taka kare yunhi ab gard-e-rah-guzar tanha
nasim-e-sub.h mujhe bhi gale lagati ja
main vo diya huun jala hai jo rat-bhar tanha
nazar men thi bhare bazar ki si virani
hujum men bhi rahe ham nagar nagar tanha
andheri raat hava saḳht tez vahshat-e-dil
ham aisi shab men bhi phirte hain dar-ba-dar tanha
musafiron pe ‘musavvir’ na jaane kya biiti
safina aaya hai sahil pe lauT kar tanha
Leave a Reply