chaman men shab ko jo vo shokh be-naqab aaya
yaqin ho gaya shabnam ko aftab aaya
un ankhdiyon men agar nashsha-e-sharab aaya
salam jhuk ke karunga jo phir hijab aaya
kisi ke mahram-e-ab-e-ravan ki yaad aai
habab ke jo barabar kabhi habab aaya
shab-e-firaq men mujh ko sulane aaya tha
jagaya main ne jo afsana-go ko khvab aaya
adam men hasti se ja kar yahi kahunga main
hazar hasrat-e-zinda ko gaad daab aaya
chakor husn-e-mah-e-char-dah ko bhuul gaya
murad par jo tira alam-e-shabab aaya
mohabbat-e-mai-o-mashuq tark kar ‘atish’
safed baal hue mausam-e-khizab aaya