Sahartab Roomani
ye tai hai main apne mutabiq nahin tha
to kya zindagi ke muafiq nahin tha
na.i to yahan ek shai bhi nahin thi
magar kuchh yahan hasab-e-sabiq nahin tha
tumhari har ik baat jhuTi bhi sach hai
mire dosto main hi sadiq nahin tha
kisi ki nazar kar-farma thi mujh men
muqallid raha huun muhaqqiq nahin tha
tha shahr-e-mohabbat mohabbat se ḳhali
vahan aaj bhi tera ashiq nahin tha
faqat bhuuk hi panje gaaḌe khaḌi thi
bahut saari jag.hon pe raziq nahin tha
‘sahar’ vo sarapa main likhta bhi kaise
koi lafz bhi us ke laa.eq nahin tha
Leave a Reply