Faisal Azeem
kaT ga.iin jab josh-e-iz.har-e-hunar men ungliyan
tab kahin Dubin mire ḳhun-e-jigar men ungliyan
dekhiye anjam kya ho ab vafa ki raah par
ham pe to uTThi hain aghaz-e-safar men ungliyan
aḳhir-e-shab men diya ḳhud ko banaya tha kabhi
aaj bhi jalti hain ummid-e-sahar men ungliyan
likh rahi hain reg-e-sahil par anokhi ḳhvahishen
aa ga.i hain teri baton ke asar men ungliyan
raushni likkhi hai main ne go mujhe malum tha
kaaT di jaati hain is andhe nagar men ungliyan
laash ke hathon pe hain kaise nishan zanjir ke
kis ki janib uTh rahi hain is ḳhabar men ungliyan
Leave a Reply