Sajjad Baqar Rizvi
dil dasht hai vafur-e-tamanna ghubar hai
ai abr-e-nau-umid tira intizar hai
phir ustuvar rabta-e-sang-o-sar hua
phir in dinon junun ko hava sazgar hai
jan-dadgi ki rasm jagao ki aj-kal
phir multafit hava-e-sar-e-rah-guzar hai
har nik.hat-e-ḳhayal asir-e-hava hui
har mauj-e-nur kam-nigahi ki shikar hai
raushan-zamir tira-nasibi ḳhuda ki shaan
itni si ab hikayat lail-o-nahar hai
haan ai hava-e-dasht idhar shahr men bhi aa
mahbus kab se nik.hat-e-gesu-e-yar hai
kahiye to kis tarah jo na kahiye to kis tarah
arz-e-suḳhan men lafz bhi be-e’tibar hai
lab-basta dil-e-kushada chaman men guzariye
ye ghunchagi ki rasm gulon ka shi.ar hai
‘baqar’ ghazal men ramz-o-kinaya baja magar
ye ehtiyat harf-e-tamanna pe baar hai
Leave a Reply