Gham-e-Hayat Ke Pesh-O-Aqab Nahin Padhta

Afsar Mahpuri

gham-e-hayat ke pesh-o-aqab nahin padhta

ye daur vo hai jo sher-o-adab nahin padhta

koi to baat hai rudad-e-khun-e-nahaq men

kahin kahin se vo padhta hai sab nahin padhta

kisi ka chehra-e-taban ki mah-e-rakhshanda

jo padhne vaala hai quran vo kab nahin padhta

vo kaun hai jo tujhe raat din nahin likhta

vo kaun hai jo tujhe roz-o-shab nahin padhta

vo ab to is qadar iz.har-e-haq se darta hai

agar likha ho kahin lab to lab nahin padhta

na jaane in dinon kya ho gaya hai saaqi ko

nigah-e-rind men husn-e-talab nahin padhta

usi ka rang hai ‘afsar’ usi ki khushbu hai

mira kalam koi be-sabab nahin padhta