Ayub Khawar
baat ye tere siva aur bhala kis se karen
tu jafa-kar hua hai to vafa kis se karen
aa.ina samne rakkhen to nazar tu aa.e
tujh se jo baat chhupani ho kaha kis se karen
haath uljhe hue resham men phansa baiThe hain
ab bata kaun se dhage ko juda kis se karen
zulf se chashm-o-lab-o-ruḳh se ki tere gham se
baat ye hai ki dil-o-jan ko riha kis se karen
tu nahin hai to phir ai husn-e-suḳhan-saz bata
is bhare shahr men ham jaise mila kis se karen
tu ne to apni si karni thi so kar li ‘ḳhavar’
mas.ala ye hai ki ham us ka gila kis se karen
Leave a Reply