Nida Fazli
jaane valon se rabta rakhna
dosto rasm-e-fatiha rakhna
ghar ki taamir chahe jaisi ho
us men rone ki kuchh jagah rakhna
masjiden hain namaziyon ke liye
apne ghar men kahin khuda rakhna
jism men phailne laga hai shahr
apni tanhaiyan bacha rakhna
milna-julna jahan zaruri hai
milne-julne ka hausla rakhna
umr karne ko hai pachas ko paar
kaun hai kis jagah pata rakhna
Leave a Reply