Muneer Ahmad Jami
jiite ji ḳhud se mohabbat men guzarna hai mujhe
surat-e-mauj-e-ravan miT ke ubharna hai mujhe
yaad men un ki main ḳhun-naba-fashan kyon na rahun
rang ab ishq ki tasvir men bharna hai mujhe
ḳhizr hain vo ki thi jin ko havas-e-ab-e-hayat
behtar-az-zist tire ishq men marna hai mujhe
har shab is hiile se aati hai chaman men shabnam
motiyon se munh har ik phuul ka bharna hai mujhe
vada-e-did uTha rakhte ho kyon mahshar par
saaf ye kyon nahin kahte ki sanvarna hai mujhe
saans ko chalte hue dekh ke main jaan gaya
jama-e-umr isi qainchi se katarna hai mujhe
zauq-agin main ghazal kyon na suna.un ‘za.iq’
naam hai jaisa mira kaam bhi karna hai mujhe
Leave a Reply