main gharib tha sahi par mira ishq tha nirala
chalo yaad to karega mujhe bhuul jaane vaala
na jalao reg-e-tafta mire dil ko yuun ḳhuda-ra
kahin phaT gaya jo dekho mire paanv ka ye chhala
kabhi sher men saraha kabhi nazm men piroya
main ne atish-e-nihan se tire husn ko ujala
miri jaan ki amaan ho main ne ki bayan haqiqat
nahin hazm hoga tujh ko ye gharib ka nivala
main zamin men gaḌ gaya tha tujhe dekh kar nashe men
miyan kal jo mughbachon ne tiri pagḌi ko uchhala
mujhe sharm aa rahi hai hare baagh mat dikhana
tujhe yaad ho jo nanga bhare baagh se nikala
Leave a Reply