Ek Pal Bhi Mere Haal Se Ghafil Nahin Thahra

ik pal bhī mire haal se ġhāfil nahīñ Thahrā

kyuuñ phir vo mire dard meñ shāmil nahīñ Thahrā

hālāt ke paale hue ifrīt ke hāthoñ

siine meñ kabhī saañs kabhī dil nahīñ Thahrā

har ḳhvāhish-e-jāñ maar ke sab rāhateñ taj ke

juz mere koī ġham ke muqābil nahīñ Thahrā

jis shaḳhs ko aatā thā hunar nauhagarī kā

vo shaḳhs bhī ab ke lab-e-sāhil nahīñ Thahrā

kuchh is ke sivā aur bhī ilzām bahut the

kab muntazir-e-ḳhanjar-e-qātil nahīñ Thahrā

Leave a Comment