Rasheed Qaisrani
miri jabin ka muqaddar kahin raqam bhi to ho
main kis ko samne rakhun koi sanam bhi to ho
kiran kiran tira paikar kali kali chehra
ye laḳht laḳht badan ab kahin baham bhi to ho
mire nasib men aḳhir ḳhala-navardi kyuun
miri zamin hai to us par mira qadam bhi to ho
har ek shaḳhs ne katba uTha rakha hai yahan
kisi ke haath men aḳhir koi alam bhi to ho
guzar lamhe sahifa ba-dast utrenge
tire nasib men faizan-e-chashm-e-nam bhi to ho
bas ab to chheḌ de ai mutriba ghazal koi
tarab-kade men vo shahzadi-e-alam bhi to ho
‘rashid’ lab pe hansi hai to aankh nam kar le
na.i ḳhushi ke muqabil purana gham bhi to ho
Leave a Reply