Ehsan Danish
zindagi men us ko kaif-e-zindagi hasil nahin
jis ka dil raz-o-niyaz-e-ishq ke qabil nahin
husn ke parde men ho sakta nahin hargiz qarar
roz-e-avval se ye laila ḳhugar-e-mahmil nahin
qadr kar dil ki ki dargah-e-ḳhuda men ai nadim
do-jahan ki ne.amaten hazir hain lekin dil nahin
hoshiyar ai mast-o-madhosh-e-javani hoshiyar
ishq vo dariya hai jo minnat-kash-e-sahil nahin
zabt-e-nala zabt-e-girya zabt-e-ulfat zabt-e-shauq
kis tarah kah duun ki ye asaniyan mushkil nahin
apna rasta apni dhun apna tasavvur apna shauq
koi bhi rahbaro yahan begana-e-manzil nahin
hai tasavvur ishrat-e-mazi ka a.ina-ba-dast
dil vahi dil hai magar vo garmi-e-mahfil nahin
der kya hai aa mire dil men sama ja barq-e-naz
shikva-sanji fitrat-e-ehsan men daḳhil nahin
iltimas-e-shauq par ‘ehsan’ mahshar Dah gaya
un ka sharma kar ye kahna main tire qabil nahin
Leave a Reply