Ghulam Husain Sajid
ishq ki dastaras men kuchh bhi nahin
jan-e-man! mere bas men kuchh bhi nahin
ik tiri yaad ka tasalsul hai
aur tar-e-nafas men kuchh bhi nahin
razdar-e-bahar-e-rafta na ho
yuun to is ḳhar-o-ḳhas men kuchh bhi nahin
parvarish pa raha hai naḳhl-e-ziyan
naf.a kya is baras men kuchh bhi nahin
aḳhir-e-kar harne ke siva
iḳhtiyar-e-havas men kuchh bhi nahin
ishq par iḳhtiyar hai kis ka
fa.eda pesh-o-pas men kuchh bhi nahin
kis liye chal paḌa huun men ‘sajid’
jab sada-e-jaras men kuchh bhi nahin
Leave a Reply