vo samne jab aa jaate hain sakte ka sa aalam hota hai
us dil ki tabahi kya kahiye amrit bhi jise sam hota hai
dete hain usi ko jam-e-tarab jo jur.a-kash-e-gham hota hai
kab bagh-e-jahan hain ḳhanda-e-gul be-girya-e-shabnam hota hai
jab valvala sadiq hota hai jab azm musammam hota hai
takmil ka saman ghaib se ḳhud us vaqt faraham hota hai
anjam-e-vafa bhi dekh liya ab kis liye sar ḳham hota hai
nazuk hai mizaj-e-husn bahut sajde se bhi barham hota hai
ye aag dahakti hai jitni utna hi dhuan kam deti hai
ehsas-e-sitam baḌh jaata hai to shor-e-fughan kam hota hai
rag rag men nizam-e-fitrat ki raqsan hai mohabbat ki bijli
ho laakh tazad azdad men bhi ik rabta baham hota hai
mil-jul ke ba-rang-e-rang-e-shir-o-shakar donon ke nikharte hain jauhar
dariyaon ke sangam se baḌh kar tahzibon ka sangam hota hai
taraj nasheman khel sahi sayyad magar itna sun le
jab ishq ki duniya luTti hai ḳhud husn ka matam hota hai
divanon ke jeb-o-daman ka uḌta hai faza men jo TukḌa
mustaqbil-e-millat ke haq men iqbal ka parcham hota hai
mansur jo hota ahl-e-nazar to dava-e-batil kyuun karta
us ki to zaban khulti hi nahin jo raaz ka mahram hota hai
ta-chand ‘suhail’ afsurda-e-gham kya yaad nahin tariḳh-e-haram
iman ke jahan paḌte hain qadam paida vahin zamzam hota hai
Leave a Reply