kuchh nahin hone ke idrak se Darta kyuun hai
ḳhaak hona hai to phir ḳhaak se Darta kyuun hai
jab kisi dast-e-zuleḳha se ta.alluq hi nahin
apne daman ke kisi chaak se Darta kyuun hai
aise mausam men to har shaḳh pe phuul aate hain
aḳhir is mausam-e-namnak se Darta kyuun hai
kal sitaron ko bhi ḳhatir men nahin laata tha
aaj sail-e-ḳhas-o-ḳhashak se Darta kyuun hai
reshmi lafz-o-bayan se suḳhan-ara.i kar
apni udhḌi hui poshak se Darta kyuun hai
vo ḳhud apne hi kisi jaal men phans ja.ega
hausla rakh kisi chalak se Darta kyuun hai
ye to bas ik ravish-e-ḳhas pe karti hai safar
aadmi gardish-e-aflak se Darta kyuun hai
Leave a Reply