mire vajud ko pamal karna chahta hai
jo hadsa hai mujhi par guzarna chahta hai
vo jumbish apne labon ko na de ye baat alag
ada ada se magar baat karna chahta hai
kaman se chahe na nikle kisi ka tir-e-nazar
magar ye lagta hai dil men utarna chahta hai
guman ye hota hai tasvir dekh kar teri
ki aks se tira paikar ubharna chahta hai
ḳhusha ye zaḳhm zahe lazzat-e-namak-pashi
kured leta huun jab zaḳhm bharna chahta hai
gharib ko havas-e-zindagi nahin hoti
bas itna hai ki vo izzat se marna chahta hai
main zindagi ko liye phir raha huun kab se ‘vaqar’
ye bojh ab mire sar se utarna chahta hai
Leave a Reply