Kanval Malik
ru-ba-ru phir se us ki ankhen thiin
phir se mushkil men ye mira dil tha
us se iz.har kar saki na main
jo miri sha.iri ka hasil tha
jo masiha tha meri basti men
ik vahi shaḳhs mera qatil tha
us ki ankhon ka dosh tha saara
ruuh chhalni thi dil bhi gha.il tha
us ko fursat nahin thi sunne ki
haal kahna bhi us se mushkil tha
na main boli na us ne puchha kuchh
main bhi ziddi thi vo bhi pagal tha
dil pe rakhta vo haath sun leta
vo miri dhaḌkanon men shamil tha
nim-shab men tha vo duaon men
tar-ba-tar ansuon men anchal tha
meri ankhen bhi paḌh saka na vo
haa.e vo shaḳhs kitna pagal tha
us ke hathon men thi shifa lekin
dard mera hi ab musalsal tha
phir mira mas.ala hi aisa tha
meri mushkil ka ek hi hal tha
bhuul jaati use ‘kanval’ lekin
bhuul jaana bhi us ko mushkil tha
Leave a Reply