Poet
sar-e-iza-rasani chal rahi hai
tabi.at men girani chal rahi hai
isi dil ke hazaron vasvason men
vahi dhaḌkan purani chal rahi hai
chala jaata hai har ik chal-chalav
jo shai hai ani-jani chal rahi hai
main barg-e-ḳhushk huun hamrah mere
hua ki bad-gumani chal rahi hai
badan men saans ki surat yaqinan
koi naql-e-makani chal rahi hai
bahut hi muḳhtasar si zindagi men
baḌi lambi kahani chal rahi hai
abhi vo saath hai mere so mujh par
ḳhuda ki mehrbani chal rahi hai
sabhi kirdar thak kar so ga.e hain
magar ab tak kahani chal rahi hai
ḳhayal aata tha us ka jis ravish par
ab us par be-ḳhayali chal rahi hai
Leave a Reply