apni rusva.i ka ehsas to ab kuchh bhi nahin
honT hi sun hain ḳhamoshi ka sabab kuchh bhi nahin
ye ujalon ke jazire ye sarabon ke dayar
sehr-o-afsun ke siva jashn-e-tarab kuchh bhi nahin
bah ga.e vaqt ke sailab men jismon ke suhag
ab na vo chashm na ruḳhsar na lab kuchh bhi nahin
reza reza hai kisi ḳhvab-e-zar-afshan ka tilism
fasl-e-gul anjum-o-mahtab ye sab kuchh bhi nahin
mere aansu inhen karte hain ujagar kuchh aur
pahle jo log sabhi kuchh the aur ab kuchh bhi nahin
ham pe to sub.h se raushan thi ye sham-e-be-kaif
tum ko is shaam se andaza-e-shab kuchh bhi nahin
shahr-e-dil shahr-e-ḳhamoshan ki tarah hai gunjan
kitna abad magar shor-o-shaghab kuchh bhi nahin
ye jahan alam-e-asbab hai nadan na bano
kaun manega tabahi ka sabab kuchh bhi nahin
rang-o-bu gul se mukar jaa.en to rahta kya hai
aag bujh jaa.e to suraj ka laqab kuchh bhi nahin
ḳhol hi ḳhol hai nau-ḳhez dabistan-e-ḳhayal
shor hi shor hai taḳhliq-e-adab kuchh bhi nahin
gum raho gum ki yahan jurm hai iz.har-e-kamal
chup raho chup ki yahan nam-o-nasab kuchh bhi nahin
meri taḳhrib se yaron ka bhala kya hoga
meri punji to ba-juz zauq-e-adab kuchh bhi nahin
us taraf va hai dar-e-rahmat-e-yazdan ‘danish’
is taraf vus.at-e-daman-e-talab kuchh bhi nahin
Leave a Reply