kya tarz-e-kalam ho gai hai
har baat payam ho gai hai
kuchh zahr na thi sharab-e-angur
kya chiiz haram ho gai hai
aage to nahin nahin suni thi
ab takiya-kalam ho gai hai
jaate jaate payam-bar ko
har subh se shaam ho gai hai
ab dekhiye mashq-e-paemali
tarif-e-khiram ho gai hai
pahunche hain jab us ki bazm men ham
majlis hi tamam ho gai hai
aalam ko hai dava-e-mohabbat
ye khaas bhi aam ho gai hai
us but ke hamin nahin hain bande
makhluq ghulam ho gai hai
barbad na hogi teri ulfat
tajviz maqam ho gai hai
jagir junun ki qais ke baad
ab ‘dagh’ ke naam ho gai hai
Leave a Reply