is tarah mah-ruḳhon ko pasheman karenge ham
ab daagh daagh dil ka numayan karenge ham
a.ina ban ke ja.enge bazm-e-jamal men
mahfil ke ru-ba-ru unhen hairan karenge ham
aa.e to vo bahar-e-dil-o-jan nigah men
ik ik nafas ko rashk-e-gulistan karenge ham
us but ko apne dil men basane se peshtar
paima.ish-e-hararat-e-iman karenge ham
mil jaa.e un ka naqsh-e-kaf-e-pa agar kahin
ik ik lakir juzv-e-rag-e-jan karenge ham
ehsan-e-vasl-e-yar bhi manzur hai magar
azar-e-hijr-e-yar ke arman karenge ham
‘aḳhgar’ kisi ki yaad men lazim hai ek jashn
ḳhun-e-jigar se ḳhatir-e-mizgan karenge ham
Leave a Reply