Hum Abhi Pakke Adakar Nahin Hain Bhai

Jawed Adil Sohavi

ham abhi pakke adakar nahin hain bhaa.i

is liye la.eq-e-dastar nahin hain bhaa.i

ye jo har roz ka rona hai hamara rona

ham mohabbat men samajhdar nahin hain bhaa.i

is liye ghar men koi rakkha na tha darvaza

main samajhta tha ki divar nahin hain bhaa.i

mujh men jaari hai musalsal ye jo dariya-e-shakeb

june ke roze bhi dushvar nahin hain bhaa.i

ḳhun-ḳhvari bhi bharose se janam leti hai

shukr karta huun ki gham-ḳhvar nahin hain bhaa.i

tum yahan aane ka ik baar irada to karo

mas.ale itne bhi dushvar nahin hain bhaa.i

beach men aa.e hain jis din se para.e rishte

baat bhi karne ko tayyar nahin hain bhaa.i