Ejazulhaq Shahab
pahle banti hi na thi baat so ab banti hai
aj-kal un ke tasavvur se ghazab banti hai
chaliye chal kar kahin DhunDe koi ujḌi hui raat
apni in chand sitaron se to kab banti hai
nafs jab ruuh pe haavi ho to phir vahshat men
tishnagi dekhiye qurbat ka sabab banti hai
surma.i shaam men suraj ka lahu mil jaa.e
tab kahin ja ke miri jaan ye shab banti hai
phir sambhale na sambhalti hai agar bigḌe to
aur bigaḌe na bigaḌti hai ki jab banti hai
pahle pahle to kisi khel si lagti hai magar
sar pe chaḌh jaa.e mohabbat to talab banti hai
ashiqi had se guzarti hai tabhi ja ke ‘shahab’
qais-o-farhad ka ranjhe ka laqab banti hai
Leave a Reply