Shakeel Badayuni

Aaj Phir Gardish-E-Taqdir Pe Rona Aaya

aaj phir gardish-e-taqdir pe rona aaya

dil ki bigdi hui tasvir pe rona aaya

ishq ki qaid men ab tak to umidon pe jiye

mit gai aas to zanjir pe rona aaya

kya hasin khvab mohabbat ne dikhaya tha hamen

khul gai aankh to tabir pe rona aaya

pahle qasid ki nazar dekh ke dil sahm gaya

phir tiri surkhi-e-tahrir pe rona aaya

dil ganva kar bhi mohabbat ke maze mil na sake

apni khoi hui taqdir pe rona aaya

kitne masrur the jiine ki duaon pe ‘shakil’

jab mile ranj to tasir pe rona aaya

Leave a Comment