le ke apni zulf ko vo pyare pyare haath men
kahte hain fitnon ki choti hai hamare haath men
saqiya donon jahan se phir to beda paar hai
gar bat-e-mai aae dariya ke kinare haath men
ashiqon ki aankh se har dam barasta hai lahu
rang par hai aj-kal mehndi tumhare haath men
khuub hai teri himayat pa ke luute naqd-e-dil
ai pari duzd-hinai maal maare haath men
hashr men ham samjhe aaya yaar ke khat ka javab
nama-e-aamal jab aaya hamare haath men
jab kabhi dast-e-hinai se katarta hai vo shokh
barq ban jaate hain afshan ke sitare haath men
munh chidhana be-sabab har-dam bigadna chhod do
ho agar ghusse men aina tumhare haath men
dast-e-saqi jam-e-jamshedi se badh kar hai mujhe
dono aalam ke main karta huun nazare haath men
vasl hai ik shahsavar-e-husn se sham-o-sahar
hai inan-e-ablaq-e-gardun hamare haath men
fikr thi un ko ki kyunkar kijiye ashiq ko qatl
aa gai tegh-e-ada-o-naz baare haath men
misl-e-shakh-e-gul lachakti hai kalai baar baar
gajre phulon ke hain ya kangan tumhare haath men
vae-qismat dekhne paaen na ham ankhon se bhi
le ke mashshata tire gesu sanvare haath men
kahte hain afshan ke zarre le ke peshani se vo
asman se ham ne ye taare utare haath men
band mahram ke vo khulvate hain ham se beshtar
aj-kal sone ki chidiya hai hamare haath men
nabz par mujh dil-jale ke ungliyan rakkhen agar
ai masiha aag lag jaegi saare haath men
haath aana ab dil-e-gum-gashta ka mumkin nahin
chhup raha duzd-e-hina ja kar tumhare haath men
dil mira mutthi men le kar mujh se kahta hai vo shokh
kya hai ai ‘nazim’ batao to hamare haath men
Leave a Reply