na samjhe koi us se dushmani hai
miri ik kam-sukhan se dosti hai
sabhi ke kaam aae ibn-e-adam
yahi dar-asl husn-e-zindagi hai
jise padhna ho is men padh le sab kuchh
khuli meri kitab-e-zindagi hai
mire kis kaam ka aisa samundar
lab-e-sahil bhi jis ke tishnagi hai
ho rudad-e-zamana ki jo maz.har
vahi dar-asl ruh-e-shaeri hai
mire dil par hai jis ki hukmarani
abhi us men ada-e-kam-sini hai
hai jis ka aaj girvida zamana
jahan-e-rang-o-bu ye aarzi hai
ajam ki tarah hai gunga arab bhi
ye us ki maslahat ya be-hisi hai
nahin fursat tan-asani se us ko
alam-angez ye adam-kushi hai
bapa hai hashr se pahle hi mahshar
kahin dukhtar kahin madar padi hai
koi shatranj-bazi men hai mashghul
kisi ki jaan par apni bani hai
dua-e-ahl-e-ghazza sun le yarab
musibat ki ye ik aisi ghadi hai
unhen hai sirf tera hi sahara
jahan bhaai se bhaai ajnabi hai
agar is men ho ‘barqi’ adamiyat
farishton se bhi afzal aadmi hai
Leave a Reply