majbur hain par itne to majbur bhi nahin
jab un ko bhuul jaaen vo din duur bhi nahin
kuchh to likhi hain apne muqaddar men gardishen
kuchh pyaar men nibah ka dastur bhi nahin
main ne suna hai tark-e-taalluq ke baad se
afsurda gar nahin to vo masrur bhi nahin
dekhi hain main ne aisi bhi dukhiya suhaganen
byahi hain aur maang men sindur bhi nahin
ye jis ka zahr ruuh men meri utar gaya
halka sa ghaav tha koi nasur bhi nahin
us ki nazar se kyuun kabhi guzre miri ghazal
aisi to khaas main koi mashhur bhi nahin