ik tiir nahin kya tiri mizhgan ki safon men
bah jaa.en lahu ban ke ye hasrat hai dilon men
dariya ho to maujon men khule is ka sarapa
pagal hai hava chiḳhti phirti hai banon men
teshe ki sada meri hi fariyad thi goya
meri hi tarah tha koi patthar ki silon men
yuun aaj phir ik hasrat-e-nakam pe ro.e
jaise na the pahle kabhi azurda-dilon men
ab sub.h se ta-sham hai sadiyon ki masafat
har lamha-e-be-qaid hai zanjir dinon men
raston pe umaDta hua phulon ka samundar
hairan huun kis tarah samaya hai gharon men
khencha tha junun ne jise daman-e-hava par
dekha to vahi shakl hai miTTi ki tahon men
kya Theren qadam dasht-e-navardan-e-vafa ke
kanTa to nahin paanv men sauda hai saron men
tausif vo yadon ka dhuan hai ki sar-e-bazm
chehre nazar aate hain charaghon ki lavon men
Leave a Reply