sadaon ka samundar
mere jism men
ek sadaon ka samundar thahar gaya hai
ye meri aankh
kisi khvab ke paiham chatakhne ki
guunj de rahi hai
main apni kokh men se
khamoshiyon ke humakne ki
avaz sun rahi huun
aur phir!
meri ungli ki poron se
mere harf bahe ja rahe hain
mere khuun ki ravaniyan
jism ki naliyon men se
kisi bipharti hui mauj ki tarah
apne sahil ko pukarti hain
aur meri saans
mere aaza ke biich se yuun ja rahi hai
jaise
viran jhadiyon ke darmiyan se
guzarti hui vo hava ho
jo sukhe hue zard patton ke raaz bantti hai
aur main apne jism ki bosida divar se kaan lagae
har ek sada ko baghaur sun rahi huun
aur shayad inhi men bah rahi hai
Leave a Reply